العلاج السريع والفعال للالتهابات المهبلية , التخلص من الام الحكة والالتهاب المهبلي بطرق فعالة واكيدة 2016

الموضوع ده غالبا كل الاناث سواء متزوجات او بنات بتعانى منه واظن مش عيب نتناقش فيه ..الموضوع طويل بس يستحق القراءه :
هنتكلم عن الاسباب والاعراض والوقايه عشان تفادى تكرار الموضوع
اولا الالتهابات دى نوعين فطري وميكروبي هما الاتنين نفس الاعراض بس مش نفس العلاج يعنى ماينفعش تاخدى دوا اختك او صحبتك وتعالجى نفسك بي لان ممكن اعراضكو متشابهه لكن تعبكو مختلف
الاعراض بتبقي عبارة عن حكة او هرش واحمرار ونزول افرازات ،،
ازاي تبقي طبيبه نفسك وتعرفي تفرق بين المرض والطبيعى
الافرازات العاديه بتبقي بيضه خفيفه واحيانا لزجة شويه اوبنيه دى بتبقي قبل او بعد الدورة بتبقي بواقي دم محبوس في الرحم
اما المرضي بتبقي افرازات مائله للاصفرار غليظه او ذو رائحه كريهه زي ظفارة واحيانا بتبقي خضرا او زرقا ودى لازم تكشفي اوعى تسيبي نفسك وتقولي بتكسف
الالتهابات دى بتأثر علي الرحم والحمل وطبعا علي علاقتك الحميمة
اسباب الالتهابات دى ايه ::
الملابس الداخليه البولستر او الالياف الصناعيه
استخدام الدش المهبلي او الغسولات او الصابون في المنطقه
الواقي الذكري احيانا او برشام منع الحمل
عدم تنشيف المكان بفوطه قطن
عدم تهويه المكان وارتداء الملابس الضيقه
الحمل ...اوبعد الدورة بيبقي نتيجه زيادة التبويض

الان نأتي الى الوقاية من الالتهابات المهبلية ::

هي عكس الاسباب .. البسي ملابس داخليه قطن %100
متغسليش المكان من جوة نهائي ولا اي غسول اكتفي بمية من برة والمكان بيغسل نفسه بنفسه
استخدام الغسولات بيقتل البكتريا الضارة والنافعه فتجنبيها
اكتفي ب لتر ميه وعليه خل واقعدى فيهم خمس دقايق او استخدامهم كتشطيف بس
تجنبو استخدام الواقي
بلاش لبس بنطلونات ضيقه او اندرات ضيقه لازم تبقي مريحه
الاهتمام بالنظافة الشخصيه واستخدام حاجه قطن للتنشيف بعد التواليت لان الفطريات بتنمو بكثره في المكان الرطب
والتنشيف يبقي من قدام لورا مش العكس لان فتحه الشرج بيبقي عليها بكتريا انتى بتاخديها من ورا لقدام وتسبب في الالتهاب
بلاش جماع اثناء الالتهاب لان جوزك بياخد العدوى وتفضلى تتعالجى انتى ولما يحصل جماع تانى يردلك المرض تانى

لما تكون في اي حاجه لازم تكشفي متستنيش ومتتكسفيش دى مش حاجه محرجه خافي علي نفسك وعلي صحتك النفسيه والانجابيه كمان ...
يارب اكون قدرت اوضحلكو الموضوع وافتكرونى بدعوة حلوة من القلب ان ربنا يشفينا من اي مرض والمسلمين جميعا يارب
‏